Nos Healthy Hour ta un forma ekselente pa kompartí ku stakeholders i otro gruponan den komunidat. Ku mas di 15 kanal di komunikashon pa manehá, nos tim di komunikashon ta gusta e fórmula di Healthy Hour, komo ku e ta duna nos interakshon direkto ku gruponan spesífiko i importante pa transishon. At’akí sinku motibu mas ku ta pone nos skohe pa e Healthy Hour:

1. Kompartí Desaroyo. Nos programa di transishon ta trahando simultaniamente riba diferente komponente pa por hasi e transishon pa Curaçao Medical Center unu eksitoso. Ainda tin hopi hende ku no ta bon na altura di tur loke nos ta kreando pa realisá e metanan di transishon. Nos ke kompartí tur esaki i kontestá pregunta den un ambiente positivo. Ku kada Healthy Hour nos ta sigui informá gruponan ku por prepará nan mes mihó pa e kambionan i tuma desishon bon informá.

2. Katalisadó pa Sektor di Kuido. Ku e kambionan digital i den e formanan di traha, oportunidatnan nobo a habri ku anteriormente no tabata posibel den sektor di kuido di Kòrsou. E posibilidatnan nobo ta un katalisadó pa aselerá kambionan ku ta benefisiá pashènt. Mas nos por informá otronan di e desaroyonan, mas nan lo por hunga un papel importante pa kosechá e benefisionan di un hospital modèrno i forma pari di trese servisionan ousiliar.

3. Best Practices. E programa di transishon akí ta úniko den asina hopi sentido, i pesei e ta esun di mas kompliká ku Kòrsou a konosé den tempu modèrno. Nos a siña hopi i ta ketu bai siñando mas, buskando solushon den algun árianan. Nos ke kompartí esakinan ku otro profeshonalnan. Nos tur por siña di otro.

4. Formando Lasonan Estrecho. Nos ta boga pa henter sektor di kuido pone interes di e pashènt na promé lugá. Pa brinda mas i mihó kuido nos mester traha huntu. Nos Healthy Hour ta un forma mas ku nos ta usa pa krea òf intensivá e lasonan ku tur esnan ku nos por traha huntu kuné pa yega na mihó koperashon i konsekuentemente logra mas balor pa pashènt.

5. Diskushonnan Fruktífero. Hopi detaye ta bai perdí den medionan di komunikashon tradishonal i sosial. Durante un Heathy Hour nos tin un ambiente diferente, ideal pa hiba kombersashonnan ku potensial pa logra transformashon i yega na kambionan duradero. E nivel di interkambio ta haltu i balansá.

Si bo sa di un grupo ku por benefisiá di un Healthy Hour, laga nos sa na communicatie@curacaomc.com