E kolónan di e edifisio di Curaçao Medical Center ta transmití e vibe kultural di nos dushi Kòrsou. E arkitektonan kurasoleño, Lyongo Juliana i Chris Zwiers ta esnan responsabel pa e toke krioyo akí. Nan esfuerso pa duna e edifisio un toke netamente “di nos” a duna fruta.

Kolónan Krioyo

Lyongo a kompartí algun di e ‘mood boardnan’ ku nan a kompilá miéntras nan tabata pensando riba kolónan pa nos hospital nobo. Por mira klaramente ku e arkitektonan a haña nan inspirashon for di e kolónan di diferente paisahe típiko di Kòrsou.

Bistanan bunita konosí pa nos tur ku ta reflehá nos klima kaluroso, bunitesa di nos naturalesa, nos monumentonan i e esensia puru di nos paisahenan típiko, ta konektá nos di tal manera ku no mester palabra pa deskribí. Aparte ku e kolónan ta un homenahe na nos kultura, nan ta funshonal tambe.

4 Dede

E kuater alanan kara pa laman -ku nos ta yama e 4 Dedenan- ta e áreanan destiná pa pashènt i nan bishitanan. Kada un di e 4 alanan akí tin su mes koló. Pará na e banda di laman, ku kara pa e edifiso i kuminsando pariba pegá ku St. Elisabeth hospital bai pabou, e alanan ta den sekuensia: Oraño, Hel, Lila i Blou.

E koló ku por mira parti pafó ta bin bèk parti paden di e ala riba e murayanan den kamber i den pasio. Di e forma akí e arkitektonan a pèrkurá ku un persona por orientá fásilmente, sea ku e ta den hòspital òf riba e área di parker. Den kualke sala, di kualke ala, lo bo sa mesora den kua parti di e edifisio bo ta, si bo pone tinu na e koló ku tin riba muraya.

Den e Atrium (Hal Sentral) por mira e kolónan ku ta indiká kua direkshon bo kue pa bai e ala ku bo ta deseá. Alabes, e kolónan ta ideal na momentu di splika e lokalisashon di sierto sitio. Usuario di e garashi di parker lo apresiá e uso di koló ya ku nan lo por kue direkshon korekto mesora.

E kolónan den Curaçao Medical Center ta sirbi pa konektá nos komo siudadanonan, i pèrkurá pa funshonalidat, mientras nan ta agradá nos sentidonan. Nos ta orguyoso i abo tambe por ta un embahador di e hospital mas moderno di Karibe!