E palabranan Healthy Hour por krea diferente interpretashon den mente di hende. Apesar di selebrá e inidvidualismo akí den kada ken, nos a sinti e nesesidat pa kompartí e konsepto tras di e evento akí ku nos siguidórnan. No pèrdè un otro artíkulo riba e tópiko akí titulá 5 Bon Motibu pa Tene Un Healthy Hour.

Wellness

HNO su Healthy Hour ta enserá 2 ora di interkambio di informashon interaktivo ku un grupo di invitado spesífiko. Ku algun pasapalo i bibida no-alkohóliko saludabel nos ta boga pa yuda plama e filosofia di Wellness ku ta akompañá prevenshon di malesa. Alabes nos ta enfoká riba formanan sano pa konstruí aliansanan fuerte den e sektor hospitalario.

Tour Virtual

Kada Healthy Hour ta start ku un ‘tour virtual’ di e edifisio nobo. Dos guia ta hasi uso di e ‘maquette’ di e edfisio nobo i un slideshow ku potrètnan di e interior pa duna un splikashon di e detayenan prinsipal.

Presentashon Spesífiko

Despues ku nos invitadonan a haña e oportunidat pa konosé e edifisio virtualmente, nos ta sigui ku un presentashon tokante di e programa di transishon. Esaki ta un forma ideal pa duna un bista kon nos timnan ta trahando pa efektuá e kambionan ku ta nesesario pa e momentu ku Curaçao Medical Center habri su portanan. Banda di esaki, nos ta reservá un sekshon pa kòmbersá tokante detayenan spesífiko I di importansia pa e grupo ku a aseptá e invitashon pa e Healthy Hour en kuestion. Un bon ilutsrashon di esaki tabata nos Healthy Hour pa Dòkternan di Kas, den kua nos a elaborá riba e posibilidatnan pa establesé un HAP (abreviashon di Huisartsen Post) ku lo ta situá riba e piso abou, pegá ku e sekshon di Emergensia.

Interkambio

Kada Healthy Hour ta kaba ku un interkambio den kua e invitadonan ta hasi pregunta, trese idea i opinion dilanti. Tin ora nos ta enkontrá ku sierto prekupashon ku ta reina. Nos ta balorá e parti importante aki di e evento, komo ku e ta duna nos e oportunidat pa aliñá ekspektativa, drecha nos komunikashon, fula kon komunidat ta balorá nos esfuersonan i averiguá kua tópikonan mester di atenshon adishonal.

Si abo sa di un grupo ku lo por benefisiá di un Healthy Hour, laga nos sa na communicatie@curacaomc.com