Dòkternan di kas a keda satisfecho despues di a partisipá na Healthy Hour den House of Change dia 12 i 14 di Mart 2019. E hecho ku den Curaçao Medical Center lo tin un HAP (na Ulandes: Huisartsen Post) ta trese hopi detaye ku ainda no tin klaridat riba dje. Tabata nèt un bon momentu pa organisá e Healthy Hour i invitá tur dòkter di kas pa interkambiá di idea I pensamentu tokante e posibildatnan amplio ku un HAP ta trese pa pashènt. Den un MoU firmá den ultimo kuartal di 2018, a deliñá e intenshon pa traha riba un forma konhunto pa manehá e HAP.

Durante e Healthy Hournan akí nos a kompartí detayenan di algun komponente prinsipal di e transishon pa Curaçao Medical Center i algun pensamentu preliminar pa maneho di un HAP.

Un total di 38 dòkter di kas a bishitá e Healthy Hournan i duna nan opinion, idea, prekupashon i speransa enkuanto e lokualnan a keda presentá. E dòkternan tabata kontentu di por a mira tur loke ta forma parti di e transishon di aserka i a indiká di ta apresiá e posibildatnan amplio pa pashènt. Algun komentario ku a sali for di kurason: “Great ku nos a haña invitashon i di por wak tur loke bosnan ta hasiendo” “Nos tin speransa awor.” “Un

programa hopi ambisioso, i hopi nesesario.” “Mara nos por a drenta edifisio pa mira mas di aserka.” “Hopi Futurístiko”. “Un soño ku ta bira realidat.

HAP: Ideanan Preliminar

Promé ku tur kos, lagami bisa ku tur loke mi ta bai kompartí den e artíkulo akí ta ideanan preliminar ku mi a skucha durante e interkambionan di e Healthy Hour ku dòkternan di kas. Esakinan no ta desishonnan, ni punto di bista ofisial. Ta djis pa dunabo un ñapa di kiko ta bibando den e arena di HAP, i pa bo keda na altura di e formanan ku nos ta trahando huntu pa pone pashènt na promé lugá.

Vishon

Un HAP ta pa sirbi personanan ku ta buska yudansa di un dòkter despues di oranan normal di ofisina. Ta hasi un triage pa determiná si e pashènt mester di kuido di emergensia òf di un dòkter di kas na warda den HAP. E intenshon ta pa dòkternan di kas subi warda den e HAP despues di 5PM, ora ku mayoria ofisina di dòkter a sera kaba. Esaki lo tin komo resultado ku dòkternan di kas lo traha warda ménos biaha ku aktualmente ta e kaso. Tambe tin deseo pa bishitá pashèntnan na kas, hasiendo uso di un shofùr. Aktualmente ta sondea e posibilidatnan pa realisá tur esakinan i ta konsiderando vários senario. Internashonalmente ta konta riba 1 HAP pa kada 160,000 hende; HNO su vision document ta inkluí 3 HAP. Unu den CMC 1 dos mas na otro puntonan riba nos isla: un pariba i un pabou.

Personal

CMC lo empleá su mes HAP Manager i lo tin su mes dòkter spesialisá pa atendé ku kasonan di emergensia ku yega hòspital. E HAP no tei pa fungi komo un triage pa sala di emergensia di CMC. Te asina leu, ta parse ku CMC lo no empleá e tim di dòkternan di kas ku lo bai traha den HAP. E intenshon ta pa ofresé e dòkternan di kas e fasilidatnan di hospital i kobra nan pa hasi uso di esaki. Asina ta duna realse na e konsepto di duna servisio ku bienestar di pashènt na promé lugá. Banda di e dòkternan di kas, e HAP lo mester di personal adishonal i e dòkternan di kas mester deliñá kon lo bai kompartí gastu, repartí e wardanan i otro responsabilidatnan ku maneho di e HAP lo trese kuné. Por último, ounke no ménos importante, nan lo mester tuma desishon di pago pa nan servisio duná den HAP.

Konsiente

Ta importante pa informá públiko di e intenshon i funshon di un HAP pa e bishitanan keda limitá na e kasonan ku ta surgi den oranan lat so. Asina por evitá ku hende ku lo por a bai den dia ta skohe pa bai anochi, djis pa nan kumbiniensia. Tin HAP den eksterior ku a dil ku e reto aki ku éksito, loke ta habri espasio pa nos siña di nan i adaptá na nos situashon lokal.

Tantu e tópiko di e Healthy Hour akí, komo e partisipashon di e dòkternan di kas ta hasi nos HAPpy i ansioso pa loke ta na kaminda den CMC. Spera mi a kontagiabo un tiki.

Laga bo komentario akibou of email nos tim di komunikashon na communicatie@curacaomc.com

Farah D. Ayoubi ta Blogger i Content Writer di e tim di komunikashon di HNO. E gusta komentario, pregunta i ideanan positivo ku ta yuda krea lasonan mas estrecho ku esnan ku ta sigui HNO. Bo feedback na farah.ayoubi@curacaomc.com por yuda forma kontenido di nos wèpsait.