Esfuersonan pa prepará pa bai edifisio nobo na final di e aña aki, ta den full swing. Marco Jacobson ta nos Moving Manager. Nos a ‘fia’ Marco serka Erasmus MC, kaminda e tabata enkargá ku e mudansa pa nan edifisio nobo na Mei 2018. Djis algun dia despues ku el a kuminsá traha na House of Change, Marco a kompartí diferente aspekto ku ta tene kuenta kuné ora un hospital ta muda.

Segun ku mi ta skucha Marco konta algun momentu memorabel durante su trayektoria komo Moving Manager, ela toka un faktor ku a resoná mésora. Ela bisa ku kisas e kos ku mas hende ta lubidá di para ketu na dje ora ta plania mudansa ta e hecho ku hende mester espasio pa por atendé ku sentimentunan di pèrdida ku nan lo por sinti ora ta bai laga edifsio bieu atras. El a konta algun historia di personal tristu ora nan a bai laga nan hòspital na Ulanda.

Pa promé bia mi a realisá ku no ta selebrashon so lo bai tin dia di mudansa. Es mas, pa nos aki na Kòrsou, asta pa esnan ku no a ni traha den St Elisabeth Hospital, despedida lo bira emoshonal sigur. Pa tur ku a krese aki Sehos ta un parti di nos. No solamente e balor riku históriko pa kultura di nos isla, pero mas ainda e vinkulonan emoshonal ku nos tur tin kuné.

Kada un di nos riba nos Dushi Kòrsou por konta un kuenta ku a sosodé einan. Beibi nan ku a nase, sernan kerí ku a bai laga nos, wesunan kibrá, wardando oras na Poli, hòrta shòrt drenta di patras ora no ta ora di bishita, momentunan di legria, esnan di tristesa, i memorianan ku nos a biba huntu ku nos amigunan i famia, den edifisio di St Elisabeth Hospital. Imaginabu pa e personal mes.

Ora nos bai laga edifisio di Sehos, nos lo yama ayó na 165 aña di memorianan klave. Pa algun hende ta nifiká kisas dékada di kana den e gangnan di Sehos i dil buska formanan kreativo pa atendê ku retonan i dil ku kehonan di pashènt. Laga nos komo komunidat duna espasio i demonstrá komprenshon pa staf i personal di Sehos por laga nan emoshonnan liber. No ta parsemi fásil pa duna tur esfuerso pa e pashèntnan muda sin peliger i tuma posishon nobo den CMC nèt den momentunan emoshonal difísil asina. Ban duna nan nos sosten na esnan ku ta kuida nos ora mas nos mester.