Tokante Nos

Nos Mensahe

Ken por a pensa ku konstrukshon di un hospital nobo na Kòrsou, lo habri kaminda pa kambio asina supstansial den nos sistema di kuido? 

Wèl, nos ta kere ku ta poko hende por a mira tur aspekto ku a krese den e proyekto di nos hospital nobo di antemano. Te ainda nos ta enkontrá ku mas posibiidat i kambio diariamente.

Nos ta HNO, Hospital Nobo Otrobanda. HNO a bira e nòmber di kariño di e proyekto di transishon i e ta nòmber di nos kompanianan ku lo bai manehá e hospital nobo. E último aki lo yama Curaçao Medical Center (CMC).

Nos a subi na bordo di e transishon akí na aña 2017. Nos no por tuma krédito pa tur kos, solamente pa e parti final i krusial, kaminda aktualmente nos ta implementá algun kos ku tabata planiá (for di kuminsamentu), huntu ku e sentenar di kosnan nobo ku tin pendiente. Pa nos ta un honor pa forma parti di e momentu importante akí den historia di Kòrsou.
Na e momentunan aki nos ta meimei di un programa di transishon ku a krese bira mas grandi ku solamente e konstrukshon i mudansa. De fakto, e ta surpasá mayoría proyekto di transishon pa hospital, si konsiderá ku ningun otro hospital a hasi un transishon simultaneo di edifisio, kompania, personal, digitalisashon i di struktura i prosesonan. Sin embargo, nos ta hañando nos kaminda den e aspektonan kompliká i elaborá di e proyekto akí; un proyekto ku di bèrdat ta úniko, i ku p’esei ta rekerí un enfoke úniko.

For di nos sede aki na House of Change nos ta traha ku un tim di profeshonal dediká ku ta tene na haltu e balor di traha huntu. Nos ta konsiente ku nos ta traha pa komunidat i pa seguridat di pashènt, ku den futuro por ta nos mes òf un ser kerí.
Mirando pa dilanti, nos ta preparando pa un periodo ku lo bira mas i mas intensivo i kompliká, miéntras nos ta yega mas serka di e momentu di habri hospital. Ta krusial pa nos tur ku ta trahando huntu, keda enfoká riba e pashènt ku ta sentral. Pa por trese e kambio akí nos tin ku pone nos mes nesesidat na di dos lugá, i kumpli ku nesesidat di nos futuro pashèntnan. Nos ta kere den traha huntu pa logra e mihó kalidat i e kuido ku ta nesesario na Kòrsou. Un kuido moderno ku ta remplasá loke nos tin i ku ya a bira antikuá.

Nos ta gradesido pa e pasenshi i diligensia di e personal aktual di nos hospital, ku a pesar di tantísimo desafio ku nan tin ku enfrentá, ta lográ duna hopi ora èkstra pa sigui kurso, asistí na diferente seshon di koordinashon i atendé ku tur inseguridat ku ta surgi, miéntras ku nos ta buska e mihó manera pa sigui. Nan apoyo i entusiasmo ta di importansia pa nos, i tambe pa e pashènt di nos futuro hospital.
Tambe nos ta gradisí yudansa di e otro hospitalnan, nos timnan eksterno, gobièrnu, i públiko en general ku ta sigui nos progreso ku vigor i entusiasmo.

Uní den Tránsito

Nos ta urgi tur ku ta envolví di un manera òf otro den e transishon akí, pa adoptá e enfoke di pashènt sentral, miéntras ku boso ta kontribuí na pasa e transishon akí ku éksito. 

Nos ta pidi pueblo di Kòrsou pa sigui sostené nos pasonan segun ku nos ta yega e dia di apertura

Klaro ku nos ta spera ku nunka bo no mester usa nos hospital nobo, pero si un dia bo mester hasi esaki, nos ta spera ku lo ta e mihó eksperensia posibel. Ta e ora ei nos lo a kumpli ku nos mishon.

Tuma kontakto ku nos

+599 9 745 0000

J.H.J. Hamelbergweg z/n Willemstad, Curaçao

info@cmc.cw