Preguntanan Popular

Lo tin un kapèl den hospital nobo?

Den nos hospital nobo lo no tin kapèl manera den e hospital katóliko aktual. Si lo tin tin un asina yamá area di trankilidat i kietut òf na ulandes “stille ruimte.
Esaki lo ta situá meimei di e hal sentral. E espasio akí, ku su murayanan bon isolá, ta diseñá pa ta un oásis di pas i kietut den hospital. Un kaminda ku hende di tur religion i kreensia por resa, meditá i tuma tempu den silensio, pa bai den nan mes i hasi uso di e energianan positivo kurativo ku nan por krea, pa nan mes òf pa nan ser kerí ku ta buska kura.

Tin vakatura pa mi por solisitá?

Sí. Nos ta pone e vakaturanan ku sali riba e wèbsait akí. Chèk bèk regularmente riba nos página di Vakatura. pa bo keda na altura di tur vakatura nobo ku sali.

Ta papia di HNO i di CMC: Ta kua awor?

HNO, o sea Hospital Nobo Otrobanda, esaki ta e nòmber di proyekto pa realisá e hospital nobo i di e kompania(nan) ku lo bai manehá e hospital nobo ku lo yama Curaçao Medical Center. Por lesa mas na About Us.

A tene kuenta ku hendenan ku sobrepeso?

Sí, tin un kantidat di kama èkstra hanchu, adekuá pa hende ku sobrepeso. Tur kamber ta ekipá ku e infrastruktura pa kologá un ‘tillift’ (un aparato spesial pa karga pashènt sin kousa leshon na profeshonalnan ku tin ku hisa e pashènt). Nos lo kuminsá ku 16 tillift ku por transferí di kamber pa kamber, segun ku esei ta nesesario. E arkitektonan a hasi estudio di e nesesidatnan spesífiko di nos aki na Kòrsou, pa por a krea un hospital ku ta kumpli ku nos rekesitonan lokal. A tene kuenta ku e desaroyonan moderno di hospital na nivel mundial, i ku mira pa futuro.

Ki dia ta bai e edifisio nobo?

No por duna un fecha eksakto pa esaki ainda. Tin hopi faktor ku ta influensiá e desishon akí. Esun prinsipal ta seguridat di pashènt. Esei ta e punto ku mas nos ta enfatisá. Su tras ta sigui e plan di desaroyo di personal i e posibilidat pa hasi diferente simulashon amplio den e edifisio nobo promé ku habri esaki. Nos ta pendiente pa determiná kon lihé e personal por adoptá e sistemanan nobo, mirando nan skema di trabou i di e tantísimo faktornan di e edifisio ku tambe mester kuadra. Ta planiá pa di dos mitar di 2019 por risibí e promé pashènt, pero nos ke mantené fleksibilidat relashoná ku e fecha, pa protehá pashènt i personal. Nos ke invitá bo lesa nos blog tokante esaki

Kiko ta bai pasa ku e edifisio aktual di SEHOS?

Esaki ta un pregunta pa SEHOS i no pa HNO, pero komo ku nos a haña nos ku e pregunta akí na vários okashon nos ta kompartí e informashon ku nos tin. Durante un di e maintanan di informashon na personal (Town Hall meeting), gerensia di SEHOS a informá esnan presente ku pronto e lo informá su trahadónan kiko lo bai pasa ku e biennan di e fundashon – ku ta kai bou di Obispado Katóliko di Kòrsou.

Pregunta?

Nos ta trahando riba un lista di pregunta i kontesta.

Yuda nos hasiele mas kompleto. Hasi bo pregunta aki. Nos tim di komunikashon lo añadí esaki na e lista di Preguntanan Popular.

HNO Transitie en Exploitatie N.V. House of Change

+599 9 465 7346

Colon Shopping Center, Units G001-G011

info@cmc.cw