Transishon

Un proyekto di transishon úniko den historia

E kantidat di proseso i struktura nobo ku lo mester implementá promé ku yega dia ku hospital habri su portanan– kada un, ta rekerí konosementu i kapasidat nobo. Ademas ta indispensabel pa tur involví konfia i partisipá ku un mente habrí pa kambio i e agilidat pa adaptá rápidamente. E proseso ta rekerí pa nos konfia i partisipá na un forma integrá i uní pa tur loke mester keda implementá keda kla na e punto final. E hospital nobo ta fungi komo katalisadó pa kambionan den nos sektor di salubridat. Kambionan nesesario pa nos krea huntu Un Futuro Nobo. I tur esaki ta hasi e proseso di transishon unu kompliká i na mes momentu unu úniko pa Kòrsou.

Magnitut di e programa di transishon

Na momentu ku tira un bista riba e siguiente seis rutanan di kambio, ta haña un idea di kon kompleho e proseso di transishon ta; ta manera wak e punta di un seru di eis den laman, sin por mira e sobrá parti ku ta bou di awa.

Transishon pa un edifisio nobo

E parti di mas visibel di nos transishon ta e edifisio nobo. Kuater ala di 3 piso ku bista riba laman, 3 ala ku kara pa Otrobanda i un hal sentral enorme ku ta e kurason di nos hospital nobo. Ounke e ta mustra práktikamente kla di pafó, ku su murayanan bunita di fèrf, parti paden tin hopi konstrukshon ta tumando lugá. Nos kontratista a duna nos diferente fecha di entrega; ku ta diferensiá pa kada ala. Miéntras tantu e fechanan di nos proveedónan di ekipo ku e instalashonnan korespondiente, i e otro rekisitonan ta bira mas konkreto pa nos. Asina nos lo por hinka esakinan den un planifikashon tremendamente elaborá. Pa apertura di e edifisio, nos mester tene kuenta debidamente ku e plan di preparashon di nos personal, i hasi vários evaluashon di riesgo promé.

Transishon pa digitalisashon

Hospital nobo lo ta un espasio kompletamente digitalisá. Nos timnan ta preparando e sistema integrá di registro di pashènt ku tur nan datonan. E sistema akí ta usa un software ku yama HiX (òf Chipsoft). Ku implementashon di HiX nos lo logra integrá informashon generá pa mashin, ekípo i hende huntu pa integrá informashon di pashènt den un fail ku ta aksesibel pa tur ku ta enbolbí den kuido di e pashènt. Esaki ta trese kuné ku HiX ta penetrá den tur funshon i proseso den nos hospital nobo. Ekipo ku ta registrá outomátikamente sin ku tin mester di intervenshon, i ku ta kontrolá si e informashon ta bálido, e dósis ta korekto i otro akshon vital. Loke ta baha márgen di eror konsiderabelmente.

 

HiX ta konfigurá na nesesidatnan spesífiko di nos hospital; e ta algu nobo pa mas ku 97% di nos personal. Esaki ta duna un indikashon di e programa di preparashon riguroso ku lo bai tuma lugá pa henter e personal di SEHOS ku ta alrededor di 1200 persona.

Transishon pa un kompania nobo

Nos ta den proseso di traspaso di e personal pa un kompania nobo ku lo operá segun un vishon finansiero nobo. E vishon finansiero aki ta den etapa final di desaroyo i a surgi a base di análisis ekstenso, entre otro di e presupuesto di e hospital aktual. HNO Transitie en Exploitatie N.V. lo akapará tur aktividat ku tin di aber ku pashènt i nan kuido, miéntras HNO Vastgoed en Beheer N.V. lo ta responsabel pa tur loke ta trata edifisio i mantenshon. E dos kompanianan aki ta kai bou di Stichting HNO Holding.

Nos ta orguyoso i kontentu di a sera un akuerdo ku SEHOS i sindikato CBV, kaminda nos a deliniá norma i regulashon pa garantisá mantenshon di e posishon hurídiko di e personal den e traspaso. E akuerdo aki, yamá Sociaal Statuut, a keda firmá dia 25 di sèptèmber 2018.

Transishon pa un mentalidat (mindset) nobo

Tur e puntonan ariba menshoná i mas a stimulá kambionan den trabou i aktitut di rekurso humano. E diferente kambionan a trese kuné e nesesidat pa krea un mentalidat nobo pa nos timnan den hospital. Kurso di Liderasgo i di Maneho di Kambio ta den tapara, miéntras ku un tim spesial di eksperto di Rekurso Humano ta fet e konosementu aktual di kada personal ku e konosementu ku ta nesesario pa e ehersé e trabounan den nos hospital nobo.

Transishon pa un otro kara di kuido

Kòrsou lo tin un gran kantidat di posibilidat, den komparashon ku loke tabata posibel te awor, na momentu ku: tur e sistemanan nobo di integrashon di data ta funshonando, nos salanan di operashon ultramoderno ku ekiponan nobo lo ta funshonal, i nos ta trahando segun prosesonan di kuido basá riba e prinsipio di pashènt pará sentral

Imaginá bo kon bo dòkter por sinta den su ofisina i analisá tur bo datonan médiko. Kon bo ta yega botika, riba e promé piso, i bo remedinan ta kla poné ta warda bo. Esaki ta djis un ñapa. Ainda tin muchu mas pa bini. Proveedónan ku ta forma parti di e kadena di hospital tambe lo mester uni i hasi e kambionan nesesario den nan servisionan.

Pensa por ehèmpel riba SVB i kompania di seguro, servisio manera di fisioterapista i kuido pa nos grandinan, instituto gubernamental, otro hospital den region, proveedó di kuminda, remedi i hopi mas. Nos ta boga pa hasi uso di e oportunidatnan ku ta surgi a bienestar di e pashènt.

Transishon pa bienestar

Maneho efektivo di kosto di nos hospital nobo ta un parti integral di transishon. Asina, komo pais nos por benefisiá di mihó kuido pa nos salú. No solamente pa e amor pa nos famia i amigunan, pero tambe pa mehorá nos footprint di kuido médiko, di forma ku nos por karga ku e kosto di kuido. Huntu ku gobièrnu, nos ta boga pa Kòrsou ta un Wellness Nation (Nashon Salú).

Tin un dokumento yamá Zorgvisie (Vishon di Kuido) ku ta pone un base pa yega na un poblashon mas salú. E aktornan prinsipal riba tereno di kuido médiko na Kòrsou a pone kabes huntu pa kompartí i diskutí e Vishon di Kuido akí pa wak kon por yuda nos pais krea e nivel di kuido ku e ta deseá i ku e meresé na un preis ku nos poblashon por karga.

Tuma kontakto ku nos

HNO Transitie en Exploitatie N.V. House of Change

+599 9 465 7346

Colon Shopping Center, Units G001-G011

info@cmc.cw