Un hospital digitalisá

Curaçao Medical Center lo ta un espasio kompletamente digitalisá. Programa komputarisá manera HiX (Hospital Information eXchange), AFAS (Applications for Administrative Solutions) i otronan lo ta algun di esnan ku lo remplasá uso di papel, mehorá proseso i baha márgen di eror.

E personal i staf lo haña oportunidat pa desaroyá i prepará nan mes debidamente pa e ambiente di trabou nobo. Asina nos ta traha riba kuido kaminda e pashènt ta pará sentral.

Ku e sistema integrá pa registrá informashon di pashènt nos personal por dependé riba formanan presiso i sigur pa atendé un pashènt. Ku un bon dominio di e programa di HiX, nos por trata pashènt mas lihé i efikas. Nos a komprometé ku nos preparashon pa pone kuido di pashènt sentral; tin kursonan tumando lugá den House of Change práktikamente tur dia pa nos logra esaki.

HiX

Nos timnan ta preparando e sistema integrá di registro di pashènt ku tur nan datonan. E sistema akí ta usa un software ku yama HiX (di e kompania Chipsoft). Ku implementashon di HiX nos lo logra kolektá i integrá informashon generá pa mashin, ekípo i hende huntu pa integrá informashon di pashènt den un fail ku ta aksesibel pa tur ku ta enbolbí den kuido di e pashènt. Esaki ta trese kuné ku HiX ta penetrá den tur funshon i proseso den nos hospital nobo. Ekiponan altamente spesialisá ta konektá na HiX pa pusha informashon kontinuo den e sistema integrá akí. Esaki ta baha kantidat di intervenshon humano ku e ekiponan i ta krea posibilidatnan nobo pa kontrolá si e informashon ta bálido, e dósis ta korekto i otro akshon vital. Asina ta baha e posibel margen di eror humano konsiderablemente. HiX ta konfigurá na nesesidatnan spesífiko di nos hospital; e ta algu nobo pa mas ku 97% di e personal aktual di hospital. Esaki ta duna un indikashon di e programa di preparashon riguroso ku lo bai tuma lugá pa henter e personal di SEHOS ku ta alrededor di 1200 persona.

AFAS i mas

For di sistema di salario te ku bestèl produkto di limpiesa, AFAS lo sentralisá i ta sigui tur moveshon den hospital ku tin un montante mará na dje. Un pedido di habon ta kuminsá kana for di e momentu ku habri e kaha di habon ku ta registrá ku a yega e kantidat mínimo, i ku djis algun klek riba un kòmpiüter e sistema integrá lo sòru pa tur hende embolbí ku esaki ta na altura i na tempu pa atendé tur e fasetanan di mantené e stòk optimal. E posibilidatnan ku digitalisashon ta trese kuné a pone ku e funshonnan a evolushoná i bira mas avansá. Nos ta preparando e personal pa e transishon ku un variedat amplio di kurso den House of Change na Colon.